Ganada altynyň bikanun gazylmagy dünýäde şokolad bilen kakaonyň bahasynyň ýokarlanmagyna täsir etdi. Bu ýurt kakaonyň öndürilişi boýunça dünýäde ikinji orunda durýar. Emma ýerli plantasiýalar altyn gözlegçileri sebäpli barha köp zaýalanýar diýip, «Financial Times» habar berýär.
Mesele, altyn gözlegçileriniň köne usuldan – «galamsi» diýlip bilinýän köne gazuw usulyndan – peýdalanmagydyr. Bu usul oba hojalyk ýerleriniň gönümel üstünde altyn känini döretmegi göz öňünde tutýar. Netijede, köne we ekologiýa taýdan zyýanly tehnologiýalaryň ulanylmagy bilen toprak zaýalanýar we toprak ekinleri ekmek üçin uzak wagtlyk ýaramaz ýagdaýa gelýär.
Daýhanlar nägile: galamsiçi toparlar ýerleri zor bilen eýelemegi ýygjamlaşdyrdylar, hökümet bolsa kanuny kärendeçileri gorap bilmeýär. Diňe geçen ýylda Gana kakaosynyň hasyly 20% peseldi.
Bu ýagdaýy ýene-de erbetleşdirýän zat – hökümet tarapyndan kakaonyň bahasyna gözegçilik edilmegi. Bu bolsa daýhanlaryň dünýä bazaryndaky şokoladyň gymmatlamagyndan girdeji alyp bilmezligine sebäp bolýar. Şonuň üçin olar beýleki oba hojalyk ekinlerine geçmäge mejbur bolýarlar.
Ganaly telekeçiler, aktiwistler we hünärmenler altyn gazylýan ýerleriň, esasan, kakaonyň iň gowy ösdürilip ýetişdirilýän topraklarynda ýerleşýändigini belleýärler.
«Financial Times» neşiriniň maglumatlaryna görä, soňky üç ýylda kakaonyň bahasy iki esse ýokarlandy. Netijede, Nýu-Ýork biržasynda kakaonyň fýuçers bahasy artdy. Şokolad öndürijileri öňki bahalary saklamak üçin, öz önümlerindäki kakaonyň mukdaryny azaldyp başladylar.
