Nýu-Ýorkda Morgan kitaphanasynda we muzeýinde Frederik Şopeniň ozal näbelli walsynyň golýazmasy tapyldy. The New York Times gazetiniň habar bermegine görä, edaranyň kuratory Robinson Makklellan kitaphananyň ýygyndysynda meşhur kompozitoryň ady bilen gol çekilen notaly saralan sahypany tapdy.
Şopene mahsus elýazma hatdan we aýdym-saz stilinden başga-da, eseriň hakykylygy kagyzynyň we syýasynyň derňew edilmegi bilen tassyklandy.
Saz eseri bary-ýogy 80 sekunt dowam edýär we 24 takty öz içine alýar (gaýtalamany goşmak bilen 48). Eser çen bilen 1830-1835-nji ýyllar aralygynda, polýak kompozitory ýigrimi ýaşlaryndan geçiberende ýazylypdyr.
Taryhçylar şeýle açyşlaryň seýrek bolýandygyny nygtaýarlar - soňky ähmiýetli tapyndy ýarym asyrdan gowrak mundan ozal tapylypdyr.
Bilermenler tapylan walsyň gutarnyklydygyny, ýöne Şopeniň beýleki walslary bilen deňeşdirilende, has gysga we has ýönekeýdigini nygtaýarlar. Eser bilen YouTube-da erkin elýeterli ýerde tanşyp bilersiňiz. Bu eseri hytaýly meşhur pianinoçy Lan Lan ýerine ýetirdi.
Frederik Şopen XIX asyryň iň meşhur we üstünlikli kompozitorlaryndan biri hasaplanýar. Ol 1810-njy ýylda Warşawanyň golaýyndaky Želýazowa-Wolýa obasynda dünýä indi. Şopen eýýäm çagalygyndan fortepianoda saz çalmakda ussada öwrüldi we tiz wagtdan ajaýyp zehinli kompozitor hökmünde meşhurlyk gazandy. Ol gysga ömründe 250 töweregi saz eserini ýazyp, Parižde 39 ýaşynda aradan çykdy.
Ozal sentýabr aýynda Germaniýada awstriýaly kompozitor Wolfgang Amadeý Mosartyň näbelli bir eseriniň tapylandygyny ýatladýarys. Bu eser 1760-njy ýyllaryň ortalarynda ýa-da ahyrynda ýazylypdyr, ýagny ýiti zehinli kompozitor ony entek ýetginjek wagty ýazypdyr. Eser, takmynan, 12 minut dowam edýän, kirişli trio üçin niýetlenen ýedi kiçi miniatýuradan ybarat.
