Ýylyň iň gowy futbolçysyna “Altyn top” baýragynyň gowşurylyş dabarasy 28-nji oktýabrda Parižde geçiriler. Bu barada baýragyň guramaçylary X sosial ulgamynda habar berdiler.
Baýraga dalaşgärler 4-nji sentýabrda yglan ediler. Baýragyň soňky eýesi Lionel Messi boldy. Onuň hasabynda sekiz sany “Altyn top” bolup, ol bu görkeziji boýunça rekord eýesidir. 2024-nji ýylda dabaranyň çäklerinde ýene iki sany täze baýrak gowşurylar – erkekleriň we zenanlaryň futbolynda iň gowy tälimçilere. Jemi 10 nominasiýa hödürlener.
Baýragy esaslandyryjy “France Football” žurnaly şu ýyldan başlap Ýewropanyň Futbol Assosiasiýalarynyň Birleşigi (UEFA) bilen hyzmatdaşlyk eder. 2010-njy ýyldan 2015-nji ýyl aralygy baýraklar Halkara Futbol Federasiýasy (FIFA) bilen bilelikde gowşuryldy.
