Günorta Koreýanyň paýtagty Seulda bir ýarym sagat hereketsiz oturmak boýunça ýaryş geçirildi. Adamlar rahatlygy saklamak başarnygy boýunça öz aralarynda ýaryşdylar. Bu barada CNN habar berýär.
Ýaryşa dört müň isleg bildirýänden 117 adam gatnaşdy.
“Ýoga üçin düşekçede oturyp, koreýalylar daşarky faktorlardan ünsi sowup, uklaman, telefony barlaman, gürleşmän oturmalydy. Olara ýürek ýygrylmasynyň ýygylygyna gözegçilik etmek üçin ýörite gurluşlar berkidildi. Hut şeýle etmek bilen bäsleşigiň guramaçylary iň rahat gatnaşyjyny kesgitlediler” – diýip, neşir belleýär.
Bu çäre Koreýanyň jemgyýeti üçin möhüm hasaplanýar, sebäbi bäsleşigiň maksady diňe bir fiziki synag däl-de, eýsem, wagtlaýyn dynç alyş ýerini döretmekden ybaratdyr.
Bäsleşigiň ýeňijisi 35 ýaşly Kwon So-A atly aýal boldy. Ol fransiýaly hudožnik Ogýust Rodeniň “Pikirlenýän adam” heýkeliniň şekilindäki baýrak bilen sylaglandy.
Gatnaşyjylaryň arasynda iş sebäpli ýüze çykýan dartgynlylykdan we emosional argynlykdan saplanmagyň ýoluny gözlän buzda tizlikli ylgaw boýunça iki gezek Olimpiýa çempiony Kwak Ýun Giniň hem bolandygy bellenilýär. Ol üçünji orny eýeledi.
Rahatlygy saklamak başarnygy boýunça ýaryş eýýäm onunjy gezek geçirildi. Onuň esaslandyryjysy Woopsyang lakamly zenan suratkeş boldy. Aýalyň özi düýpli emosional argynlygy başdan geçirenden soň, şeýle çäräni döretmek kararyna geldi.
