Demirgazyk Karolinanyň (ABŞ) ýaşaýjysy Eşli Massis Klass birnäçe aýlap üç ýaşly gyzjagazynyň nämeden zeýrenýändigine düşünip bilmedi. Gyzjagaz öz otagynyň diwarynyň aňyrsynda “nägehanlaryň” ýaşaýandygyny aýdýardy. Ene-atasy ilkibaşda gyzjagazyň bolşuny maşgalada ikinji çaganyň dünýä inmegi bilen baglanyşdyrdylar, emma öz köne öýleriniň üçeginde we otaglarynda günsaýyn köpelýän arylary görenlerinde munuň beýle däldigine göz ýetirdiler diýip, People neşiri ýazýar.
Zyýan berijilerden goraýyş kompaniýasy bularyň bal arylarydygyny we olara ýitip gitmek howpunyň abanýandygyny, şol sebäpli olara awy sepmegiň gadagandygyny düşündirdi. Soňra är-aýal teplowizorly (ýylylyk görkezýän enjamy bolan) balaryçyny çagyrdylar. Onuň ýüze çykaran zady är-aýaly haýran galdyrdy. Balaryçy diwary döwen pursady jaýyň eýesi gorkunç film görýändirin öýtdi. Balary üýşmeginiň jaýyň diwarynda ary kökesini ýasandygy we sekiz aýyň içinde onuň ägirt uly möçberlere - takmynan 50 müň sany balary sygýan ululyga ýetendigi ýüze çykdy.
Balarylar öýe tüsseçykaryň deşiginden giripdirler.
Aryçy ene aryny, üýşmegiň bir bölegini we 45 kilogram balary öýjügini aýyrmagy başardy, ýöne birnäçe müň ary öldi.
Jaýa ýetirilen zyýan, takmynan, 20 müň dollar töweregi diýlip çaklanylýar we olar arylaryň öýe giren deşigini ýapmaly, diwary dikeltmeli, gaýtadan izolýasiýa etmeli we bal akyp zaýalanandygy sebäpli ähli elektrik simlerini täzeden çekmeli bolar. Şu işler edilen ýagdaýynda hem arylaryň balyň ysyna gaýdyp gelmek ähtimallygy bar.
