“Sanly ykdysadyýet innowasion merkezi” ýapyk görnüşli paýdarlar jemgyýetiniň esaslyk maýasyndaky paýnamalary bäsleşikli söwda arkaly hususylaşdyrmak meýilleşdirilýär. Degişli teklip Türkmenistanyň Prezidentiniň garamagyna 29-njy martda geçirilen Hökümet mejlisinde hödürlenildi.
Mejlisiň barşynda wise-premýer H.Geldimyradow Maliýe we ykdysadyýet ministrligi tarapyndan döwletiň paýly gatnaşmagynda döredilen hojalyk subýektlerindäki degişli paýlary döwletiň garamagyndan aýyrmak we hususylaşdyrmak boýunça seljermeleriň yzygiderli geçirilýändigini habar berdi. Şunuň bilen baglylykda, Türkmenistanyň Prezidentiniň garamagyna “Sanly ykdysadyýet innowasion merkezi” ÝGPJ-niň esaslyk maýasyndaky paýnamalary bäsleşikli söwda arkaly hususylaşdyrmak baradaky teklip hödürlenildi. Paýdarlar jemgyýetiniň esasy iş ugurlary lomaý söwda, işleri we hyzmatlary ýerine ýetirmek, maýa goýumlary çekmek hem-de telekeçilik işini alyp barmak bilen baglydyr.
Serdar Berdimuhamedow hasabaty diňläp, döwlet emlägini hususylaşdyrmak hem-de ony dolandyrmagyň netijeliligini ýokarlandyrmak işlerini dowam etdirmegiň zerurdygyna ünsi çekdi. Munuň özi ýurdumyzda kiçi we orta telekeçiligi netijeli ösdürmäge ýardam berer diýip, döwlet Baştutany aýtdy we wise-premýere birnäçe anyk tabşyryklary berdi.
