Ykdysady Hyzmatdaşlyk we Ösüş guramasynyň (YHÖG) maglumatlaryna görä, dünýä ykdysadyýetiniň ösüşi şu ýylyň ahyryna çenli gowşak bolar we 2023-nji ýylda has hem peseler. Muny “Golos Ameriki” ýetirýär.
YHÖG haýallamanyň esasy sebäpleriniň biri hökmünde Russiýa bilen Ukrainanyň arasyndaky ýagdaýlary we Hytaýyň sosial-ykdysady syýasatyny belledi.
“Uruş, energiýa göterijiler we azyk önümleri üçin bahalaryň ýokary bolmagy, şeýle-de Hytaýyň COVID-19 üçin syýasaty ösüşiň haýallajakdygyny, inflýasiýanyň bolsa has ýokary we durnukly boljakdygyny aňladýar” – diýip, YHÖG-niň baş sekretary Matias Kormann žurnalistlere aýtdy.
Hasabatda tutuş dünýäde COVID-19 bilen bagly gorkularyň gowşandygy sebäpli, ykdysady işiň işjeňleşendigi nygtalýar.
Şol bir wagtyň özünde, çaklamalara görä, global ösüşiň 2022-nji ýylyň ikinji ýarymynda gowşak boljakdygy we 2023-nji ýylda hasam haýallap, ýylda bary-ýogy 2,2% boljakdygy bellenilýär.
