Horwatiýa 2023-nji ýylyň 1-nji ýanwaryndan ýurduň esasy pul birligi hökmünde ýewrony ulanmaga geçer. Bu barada ýurduň wise-premýeri, maliýe ministri Zdrawko Mariç Rowin şäherinde geçirilen “Horwatiýa ýewro zolagynyň bir bölegi hökmünde” atly konferensiýada eden çykyşynda aýtdy diýip, TASS habar berýär.
“Biz 2023-nji ýylyň 1-nji ýanwary gijesi ýewro geçýäris we pul serişdeleriniň iki hili dolanyşygy ýene iki hepde dowam eder, ýagny raýatlar kunada hem töleg edip bilerler, şondan soň diňe ýewroda töleg ediler. Bahalary hem kunada, hem ýewroda görkezmek döwri azyndan bir ýyl dowam eder” – diýip, HRT milli telewideniýesi Mariçiň sözlerini getirýär.
Maliýe ministriniň aýtmagyna görä, Horwatiýanyň ýewro zolagyna goşulýandygy barada 2022-nji ýylyň ortalarynda resmi taýdan yglan edilmegine garaşylýar. Mariç gysga wagtyň içinde dolanyşykdan tas 1,1 mlrd teňňäni (kuna we lipa), şeýle-de 500 mln banknoty (kuna) çykarmagyň zerurlygyna ünsi çekdi.
Şunuň bilen birlikde, ýurduň ýewronyň ulanylyşyna geçmegini üpjün etmek maksady bilen hökümet, ministrlikler we beýleki degişli edaralar 40 töweregi kanuny we 70 sany dürli degişli aktlary adaptirlemeli bolýarlar.
