Türkmenistan ýanwar-sentýabr aýlarynda elektrik energiýasynyň eksportynyň bahasyny, 2019-njy ýylyň 9 aýy bilen deňeşdirilende, 2,4 esse ýokarlandyrdy. Üpjünçiligiň fiziki mukdary bolsa 2,1 esse artdy. Bu barada Türkmenistanyň Statistika baradaky döwlet komitetine salgylanyp, ORIENT habar berýär.
Häzirki wagtda türkmen elektrik energiýasyny esasy satyn alyjylar Owganystan, Eýran we Özbegistandyr. Ýakyn geljekde onuň goňşy Owganystana iberilişini artdyrmak meýilleşdirilýär.
Ýanwar-oktýabr aýlarynda Türkmenistanyň Energetika ministrligine degişli kärhanalar elektrik energiýasynyň önümçiligini, geçen ýylyň degişli döwri bilen deňeşdirilende, 40,3% ýokarlandyrdy. Olar 2020-nji ýylyň on aýy üçin önümçilik meýilnamasyny 122,9% ýerine ýetirdiler.
Şu ýylyň başynda öň Ministrler Kabinetiniň başlygynyň orunbasary wezipesini ýerine ýetiren Çarymyrat Pürçekow Türkmenistanyň Energetika ministri wezipesine bellendi. Ministri wezipä belläp, Türkmenistanyň Prezidenti Gurbanguly Berdimuhamedow elektrik energiýasynyň önümçiligini we eksportyny ýokarlandyrmagyň, Türkmenistan-Owganystan-Pakistan elektrik geçiriji liniýasynyň gurulmagynyň zerurdygyny aýtdy.
Senagaty ösdürmek meýilnamasyna laýyklykda, 2024-nji ýyla çenli Türkmenistanda elektrik energiýasy ýylda 33 milliard kilowat sagada ýetmeli. Bu maksada ýetmek üçin bar bolan önümçilik desgalary döwrebaplaşdyrylýar. 2018-nji ýylda ýurtda ilkinji kombinirlenen aýlaw elektrik stansiýasy açyldy.
