Гурбангулы Бердымухамедов совершил рабочую поездку по столице

9-njy aprelde Prezident Gurbanguly Berdimuhamedow paýtagtymyz boýunça iş saparyny amala aşyryp, iri gurluşyk meýdançalarynda alnyp barylýan işleriň ýagdaýlary bilen tanyşdy.
Saparyň barşynda döwlet Baştutany Aşgabadyň täze dolandyryş-işewür merkeziniň kemala gelýän günorta künjeginde bina edilýän täze gurluşyklary synlady. Olaryň hatarynda Halk Maslahatynyň Diwanynyň binalar toplumy we Türkmenistanyň Maslahatlar merkezi, Kabul ediş merkezi, «Arkadag» kaşaň myhmanhana, Hökümet münberiniň binasy bar.
Gurbanguly Berdimuhamedow gurulýan binalary häzirki zaman tehnologiýalary hem-de sanly ulgamlar bilen enjamlaşdyrmagyň ähmiýeti barada aýdyp, bu ýerde netijeli işlemek hem-de köpçülikleýin çäreleri ýokary derejede geçirmek üçin şertleri döretmek baradaky meseleleriň çözülmegine toplumlaýyn çemeleşmegiň zerurdygyna ünsi çekdi.
Türkmenistanyň Prezidentiniň belleýşi ýaly, şäheriň bu böleginde täze desgalar gurlanda, ýerli tebigy aýratynlyklar göz öňünde tutulmalydyr hem-de häzirki zamanyň täze gurluşyklary biri-biri bilen sazlaşmalydyr. Binalaryň bezelişi şeýle desgalara bildirilýän talaplara doly kybap gelmelidir hem-de milli bezeg aýratynlyklaryny beýan etmelidir diýip, döwlet Baştutanymyz aýtdy we şunuň bilen baglylykda anyk tabşyryklary berdi.
Gurbanguly Berdimuhamedow binalaryň bezelişine hem-de bu ýerde ulanylýan dürli serişdelere ünsi çekip, şu işleriň hiliniň ýokary derejesini we olaryň bildirilýän talaplara laýyk gelmegini üpjün etmegi tabşyryp, ulanylýan serişdeleriň berkligi hem-de uzak möhletleýinligi bilen tapawutlanmalydygyny nygtady.