Benzema başga ýygyndy toparda oýnamaga taýýardygyny mälim etdi

“Realyň” hüjümçisi Karim Benzema 4 ýyldan bäri fransuz ýygyndysyndan çakylyk alanok. Bularyň ählisi dawa bilen baglanyşykly, ýagny onda Karim özüniň watandaşy Matýe Walbuena haýbat atanmyş. Muňa garamazdan, 31 ýaşly hüjümçi halkara derejesindäki karýerasynyň tamamlanandygyny habar edenok. Mümkin, Benzema Fransiýanyň ýygyndy toparyna dolanmagy ýa-da ony çalşyrmagy umyt edinýändir.
Ýaňy-ýakynda bolsa Fransiýanyň futbol Federasiýasynyň prezidenti Noel Le Gre Benzemanyň ýygynda hiç haçan goşulmajakdygyny anyk aýtdy - tälimçiniň kimdigi hem möhüm däl: “Elbetde, ol örän güýçli futbolist. Ýöne men ony şeýle işi üçin bagyşlap bilmeýärin. “Realda” ol esasy oýunçy, bu onuň öz işine ökdeleriň biri diýmekdir. Ýöne onuň ýygyndy topardaky karýerasy tamamlandy”.
Öz gezeginde Karim hem twitterda şeýle ýazýar: “Ýygyndy toparda karýerany gutarmalymy ýa-da däl, muny diňe men çözerin. Eger-de kimdir biri meniň bilen hemme zat gutardy diýip hasaplasa, onda maňa başga bir ýygyndy topary saýlamaga mümkinçilik beriň. Maňa çykyş etmäge rugsat ediljek ýygyndyny we ähli adamlaryň meniň oýnumy görüp biler ýaly topary beriň”.
Benzemanyň ýagdaýy aňsat däl. Raýatlygyňy üýtgetmäge mümkinçilik az, ýöne muny hakykatdan hem amala aşyryp bolýar. FIFA-nyň düzgünlerinde hem şeýle mümkinçilik bar, hatda gürrüň 21 ýaşdan uly futbolist hakynda gitse hem – eger-de oýunçy öz islegi boýunça ýurduň raýatlygyndan aýrylmadyk bolsa (meselem, hökümetiň çözgüdi boýunça).
Benzema futbol raýatlygyny çalyşmak üçin FIFA ýüz tutmaly bolýar. Şeýle ýüz tutma fotbolisti kabul etmäge taýýar bolan, ýurduň futbol Federasiýasyndan hem bolmaly. Karimde iki wariant bar: Alžir (onuň ene-atasy şu ýurtda doguldy) we Ispaniýa (oýunçy azyndan bäş ýyl çykyş etjek ýygyndy toparynyň döwlet çäginde ýaşamaly bolýar).
60-njy ýyllaryň başynda FIFA futbolistiň diňe bir ýygyndy toparda oýnap biljekdigi barada çözgüt kabul edýär. Bu shema Katar ýygyndy toparyna brazil oýunçylaryny çagyryp başlanda, ýagny 2000-nji ýyllarda bozulýar. Şonda FIFA düzgünleri güýçlendirýär – indi raýatlygyny çalşan wagtynda oýunçy şu şertleriň iň bolmanda birini ýetirip bilende täze ýurduň ýygyndy toparynda çykyş edip bilýär:
- Ol şu ýurduň territoriýasynda doguldy;
- Biologiki ene-atasynyň iň bolmanda biri şu ýurtly hasaplanylýar;
- Oýunçynyň enesi ýa-da atasy şu ýurtda doglan;
- Ol şu döwletiň çäginde bäş ýyl üznüksiz ýaşady.