Türkmenistandan Täjigistana barýan demir ýol geçelgesiniň möhüm şahasy açyldy

Şu gün Owganystan Yslam Respublikasynyň Farýab welaýatynyň Andhoý etrabynyň Akina demir ýol stansiýasynda gurlan 10 kilometr demir ýol şahasy dabaraly ýagdaýda ulanyşa girizildi. Şeýle hem Akina — Andhoý demir ýolunyň gurluşygyna badalga berildi. Dabara gatnaşmak üçin, Türkmenistanyň wekiliýetiniň agzalary Owganystan Yslam Respublikasynda gulluk iş saparynda boldular. «Türkmendemirýollary» agentliginiň başlygynyň ýolbaşçylygyndaky türkmen wekiliýetiniň düzümine şeýle hem Türkmenistanyň Ulag we kommunikasiýa, daşary işler ministrlikleriniň, Kerki şäheriniň häkimliginiň wekilleri, Lebap welaýatynyň ýaşululary hem-de habar beriş serişdeleriniň wekilleri girdiler.
Owgan tarapyndan dabara Owganystanyň ulag ministri Ýama Ýari, bu ýurduň demir ýol ulaglary edarasynyň başlygy Mohammad Ýama Şams, Farýab welaýatynyň, Andhoýuň häkimi we beýleki ýolbaşçylar, şeýle hem Owganystanyň Türkmenistandaky ilçisi gatnaşdy, diýip ORIENT agentligi habar berýär.
Dabarada söz sözlenenden soňra toý bagy kesilip, 10 kilometrlik demir ýol şahasy açyldy, soňra bolsa 30 kilometr uzynlykly Andhoýa çenli demir ýoluň ilkinji rels seplemesi amala aşyryldy.
Akina-Andhoý geçelgesini gurmak hakynda Ähtnama 2019-njy ýylyň fewralynda Aşgabatda Türkmenistanyň we Owganystanyň demir ýol edaralarynyň ýolbaşçylarynyň gatnaşmagynda gol çekilipdi. Täze ýol Türkmenistan — Owganystan — Täjigistan ulag geçelgesiniň bir bölegi bolan Kerki-Ymamnazar-Akina geçelgesiniň dowamy bolar.