Türkmenistan Owganystana ynsanperwer kömeginiň täze tapgyryny iberer

Türkmen halkynyň gadymdan gelýän hoşniýetli goňşuçylyk gatnaşyklaryndan we ynsanperwerlik däp-dessurlaryndan ugur alyp, goňşy Owganystan Yslam Respublikasyna ykdysady, durmuş hem-de ynsanperwer ugurlarda ýardam bermek maksady bilen, Türkmenistanyň Prezidenti Buýruga gol çekdi. Resminama laýyklykda, Türkmenistanyň Bilim ministrligine, Saglygy goraýyş we derman senagaty ministrligine, Söwda we daşary ykdysady aragatnaşyklar ministrligine, şeýle hem Senagatçylar we telekeçiler birleşmesine Owganystan Yslam Respublikasyna ynsanperwer kömegi hökmünde resminamada bellenilen önümleri muzdsuz bermek tabşyryldy.
Belläp geçsek, Bilim ministrligi Owganystanyň demirgazyk sebitlerinde ýaşaýan türkmenleriň çagalary üçin zerur bolan mekdep kitaplaryny (dürli dersler boýunça 1-5-nji klaslar üçin) iberer.
Saglygy goraýyş we derman senagaty ministrligi lukmanlaryň işinde we hassahanalarda zerur bolan derman serişdelerini we çig mal serişdelerini iberer. Söwda we daşary ykdysady aragatnaşyklar ministrligi zerur bolan mekdep esbaplaryny, Dokma senagaty ministrligi matraslary, ýassyklary, dürli ýaşdaky çagalar üçin egin-eşikleri iberer.
Şeýle hem Türkmenistanyň Senagatçylar we telekeçiler birleşmesi 20 tonna konditer önümlerini, tebigy miwe suwlaryny, alkagolsyz içgilerini iberer - diýip centralasia.news habar berýär.
Ýatlatsak, 1-nji iýulda 60 tonna möçberde ekologiýa taýdan arassa benziniň ilkinji tapgyry Owganystana iberilipdi.
Belläp geçsek, Türkmenistan yzygiderli ýagdaýda Owganystana ynsanperwerlik kömegini iberýär. Hususan-da, ençeme ýyllaryň dowamynda Türkmenistan Owganystanyň demirgazyk etraplaryny ýeňillikli bahadan elektrik energiýasy bilen üpjün edip gelýär.