ABŞ-nyň iň gür ilatly ştaty bolan Kaliforniýanyň ilatynyň sany geçen ýyl 180 müňden gowrak adam azaldy. Bu hadysa ştat 1850-nji ýylda esaslandyrylandan bäri ilkinji gezek boldy diýip, Associated Press agentligi habar berýär. Muny mk.ru ýetirýär.
Agentligiň belleýşi ýaly, geçen hepde ABŞ-nyň ilat ýazuwy býurosy Kaliforniýanyň ABŞ-nyň Kongresinde ilkinji gezek bir orny ýitirjekdigini duýdurdy.
Soňky ýyllarda beýleki amerikan ştatlarynda ilat Kaliforniýa garanda has çalt ösýär. Kaliforniýanyň döwlet syýasaty instituty tarapyndan geçirilen ilat ýazuwynyň maglumatlarynyň seljerilmesine görä, 2010-njy ýyldan 2020-nji ýyl aralygynda Kaliforniýa 4,9 mln töweregi adam göçüp bardy, takmynan, 6,1 mln adam bolsa beýleki ştatlara göçdi.
Respublikanlar bu “progressiw syýasat”, jaý bahalary, ýokary salgytlar bilen bagly bolup biler diýip hasaplaýarlar. Şeýle-de, 2020-nji ýylda Kaliforniýada koronawirus pandemiýasy sebäpli 51 müň adam ýogaldy. Agentligiň maglumatlaryna görä, “kowiddan öňki” ýyllarda Kaliforniýa 140-150 müň, 2020-nji ýylda bolsa 29 müň daşary ýurtly göçdi. Tutuş dünýädäki lokdaunlar Kaliforniýa gelýän daşary ýurtly talyplaryň sanynyň 29%, ýa-da takmynan, 53 müň adam azalmagyna getirdi. Mundan başga-da, Kaliforniýada çaga dogluş derejesi peselmegini dowam etdirýär.