Ispaniýanyň La Ligasynyň 29-njy tapgyrynyň “Walýadolid” bilen oýnundan öň Kataloniýanyň “Barselonasynyň” oýunçylary Lionel Messiniň klub üçin geçiren oýunlarynyň sany boýunça rekord goýmagy mynasybetli oňa sowgat gowşurdylar.
Bu sowgat 2004/05-möwsüminiň “Barselona” futbolkasydy, onda Lionel Messi kataloniýalylar üçin uly ýaşlylaryň derejesinde ilkinji gezek çykyş edipdi. Bu futbolkada “gök-gyzyllaryň” taryhynda iň meşhur oýunçylaryň gollary jemlenen.
Ýatlap geçsek, 21-nji martda Ispaniýanyň çempionatynyň 28-nji tapgyrynyň “Real Sosýedad” bilen oýnunyň netijesinde, Lionel Messi “Barselona” üçin hasabynda 767 oýun bolan Hawiniň rekordyndan geçdi. Argentinaly oýunçy klub üçin geçiren oýunlarynyň sany boýunça ýeke-täk lider boldy – häzirki wagta çenli ol “Barselonanyň” futbolkasynda 769 oýna gatnaşdy.
