Taýson Fýuri bilen Entoni Joşuanyň arasynda agyr agram derejesinde dünýä çempiony diýen at ugrundaky göreş eýýäm şu tomusda bolar. Boksçularyň ikisi hem ilkinji söweşi üçin hersi 100 million funt sterling (takmynan, 140 million dollar) alar. Ikinji duşuşykda ýeňiji girdejiniň 60%-ini, ýeňilen bolsa 40%-i alar diýip, “The Mirror” habar berýär.
Promouter Joşua Eddi Hirna bu maglumatlaryň dogrudygyny, boksçylaryň iki söweş üçin şertnama baglaşandygyny tassyklady. Olaryň birinjisi, çak bilen iýun ýa-da iýul aýlarynda bolar.
“Ýakyn wagtda ähli taraplar bu şertnamany resmi taýdan tassyklarlar. Söweşleriň geçirilişi barada ylalaşmak üçin köp tagalla etdik. Bize bäsdeşlik edýän promouterler we boksçylar bardy. Esasy kynçylyklaryň yzda galandygyna begenýärin.
Bu söweşiň möçberiniň gaty uludygyna görä, ony satmagyň hem kyn bolmajakdygyna ynanýaryn. Eýýäm Ýakyn Gündogaryň, Aziýanyň, Gündogar Ýewropanyň we Amerikanyň dürli ýurtlaryndan teklipler geldi. Bize iň uly söweş we dünýädäki iň uly sport wakalarynyň biri garaşýar. Bu, özüni görkezmek isleýän ýurt üçin uly üstünlik bolar"-diýip, Hirna belledi.
Ilkinji söweşiň geçiriljek ýeriniň Saud Arabystanynyň boljakdygy aýdylýar. Iki tarapam münberde tomaşaçylaryň bolmagyny talap edýär.
