Angliýanyň Premýer-ligasynyň 22-nji tapgyrynda "Mançester Ýunaýtediň" futbolçylary "Old Trafford" stadionynda "Sautgemptony" ýeňip, garşydaşyň derwezesine 9 jogapsyz pökgi geçirdi. Netijede, oýun 9:0 hasabynda tamamlandy.
“Gyzyl arwahlardan” Entoni Martial iki gol geçirip, dubl etdi (69-njy, 90-njy minut) we Aaron Wan-Bissaka (18), Markus Reşford (25), Edinson Kawani (39), Skott MakTominaý (71), Brunu Fernandeş (87, penaltiden) we Deniel Jeýms (90+3) dagy tapawutlandylar. Ýene bir pökgini "Sautgemptonyň" goragçysy Ýan Bednarek öz derwezesine gönükdirdi (35).
Myhmanlaryň duşuşygyň köp bölegini azlykda geçirendigini bellemek gerek - oýnuň ýaňy bir ikinji minudynda Aleksandr Ýankewiç gödek hereketi üçin gyzyl kartoçka bilen jezalandyrylyp, oýundan çykaryldy. Emin duşuşygyň dowamynda jemi bäş sany sary kartoçka görkezdi.
“Mançester Ýunaýted” soňky bäş oýunda ikinji ýeňşini gazandy we 44 utuk toplap, sanawyň lideri we ätiýaçda iki oýny bolan “Mançester Sitiniň” yzyndan ýetdi. Bassyr dördünji gezek utulan "Sautgempton" bolsa 29 utuk bilen 12-nji setirde ýerleşdi.
