Aşgabadyň «Altyn asyr» topary futbol boýunça Türkmenistanyň 2020-nji ýylda Naýbaşy kubogynyň eýesi boldy. Bu topar düýn Aşgabadyň köpugurly «Aşgabat» stadionynda “Ahal” topary bilen duşuşdy.
Duşuşygyň 68-nji minudynda «Ahalyň» ýarym goragçysy Gurban Annaýew hasaby açdy. Emma, birnäçe minutdan soňra, «Altyn asyryň» futbolçylary hasaby deňlediler, bu hasap oýun tamamlanýança üýtgemedi. Goşmaça wagtda hem hasap üýtgemedi we eminler topary 1:1 deňme-deň hasapdan soň, 11 metrlik urgulary geçirmegi karar etdiler.
11 metrlik urgulary ýerine ýetirmekde iki toparyň futbolçylary hem ýokary ussatlyk görkezdiler, emma «Ahal» toparynyň goragçysy Serdar Annaorazowyň ýalňyşy bu toparyň bäsdeşine ýeňiş getirdi.
Paýtagtymyzyň «Altyn asyr» topary on bir metrlik urgularyň jemleri boýunça 5:4 hasabynda ýeňiş gazanyp, futbol boýunça Türkmenistanyň Naýbaşy kubogyna altynjy gezek mynasyp boldy. Bu toparyň futbolçylary bu hormatly sport baýragyny 2015-nji ýyldan bäri yzygiderli eýeläp gelýärler.
