«Pari Sen-Žermen» futbol klubynyň oýunçylary «RB Leýpsig» nemes klubyny 3:0 hasabynda ýeňdiler we taryhynda ilkinji gezek Çempionlar ligasynyň final tapgyryna çykdylar.
Duşuşykda Markinýos (13-nji min), Anhel Di Mariýa (42) we Huan Bernat (56) gol geçirdiler. «PSŽ» bu ýaryşyň final tapgyryna çykmagy başaran bäşinji fransuz klubydyr.
Öň, Çempionlar ligasynyň final tapgyryna «Reýms» (1956,1959), «Sent-Etýen» (1976), «Marsel» (1991, 1993) we «Monako» (2004) klublary çykmagy başarypdy.
Final tapgyrynda «PSŽ-niň» garşydaşy şu gün agşam duşuşyk geçirjek fransuz «Liony» bilen mýunheniň «Bawariýasynyň» ýeňijisi bolar.
Çempionlar ligasynyň finaly Portugaliýanyň paýtagtynda 23-nji awgustda geçiriler.
