Bütindünýä Saglygy Goraýyş Guramasynyň (BSGG) bilermenler topary täze koronawirusyň gelip çykyşyny kesgitlemek üçin Hytaýa gitdi diýip, BSGG-niň metbugat sekretary Margaret Harris aýtdy.
"Olar eýýäm uçdular, häzir ýoldadyrlar. Topar işiň möçberini kesgitlär" diýip, TASS habar gullugy Reuters habar gullugyna salgylanyp, Harrisiň sözlerini getirýär. Şeýle hem toparda epidemiologlaryň we zoologlaryň bardygy aýdylýar.
Çarşenbe güni BSGG-niň baş müdiri Tedros Adan Gebreýesus toparyň esasy wezipesiniň BSGG-niň ýolbaşçylygyndaky halkara missiýa üçin esas hem-de iş meýilnamasyny taýýarlamakdygyny aýdypdy. Hünärmenleriň esasy maksady wirusyň haýwany gelip çykyşyna düşünmek we haýwanlardan adamlara nädip ýokaşýandygyny kesgitlemek bolar.
Ýadymyzda bolsa, BSGG koronawirusyň gelip çykyşyny kesgitlemek üçin Hytaýa hünärmenleri ugratmak kararyna 29-njy iýunda gelipdi.
