12-nji dekabrda Britaniýanyň ylmy muzeýinde açyljak sergide XVIII-XIX asyryň başynda Fransiýanyň şa zenany Mariýa Antuanetta üçin döredilen sagat ilkinji gezek köpçülige görkeziler. Eksponat “Versailles: Science and Splendour” sergisiniň bir bölegi bolar diýip, BBC habar berýär.
Sagat 1783-nji ýylda şa zenanynyň sargydy bilen şweýsariýaly ussat Awraam Lui Brege tarapyndan ýasalypdyr. Bu üýtgeşik sagady döretmek üçin 44 ýyldan gowrak wagt gerek bolupdyr. Şa zenany bu sargydyny görmän dünýäden ötüpdir: Mariýa-Antuanetta adamsy, Fransiýanyň koroly Lýudowik XVI bilen bilelikde 1793-nji ýylda jezalandyryldy. Sagat bolsa Brege ýogalandan dört ýyl soň, 1827-nji ýylda doly ýasalyp gutaryldy.
Sagat 823 sany bölek şaýdan ybarat bolup, düzüminde altyn, platina, ýakut we sapfir bar.
Sagadyň aýratynlygy - aňyrsyndaky mehanizmler görnüp duran billur dilleriniň bolmagydyr. Olar sagady, çärýek sagady we minutlary görkezýär. Şeýle hem önümde doly ýyla düzülen senenama, sekund görkezýän dil we termometr bar. Bu sagat öz döwri üçin öwrülişik hasaplanýar.
"Iň ownuk böleklerinde-de inçe inženerçilik yhlasyny hem-de bilime, gözellige wepalylygy, sergimizde we Wersalyň özünde gaýtalanýan ideallary özünde jemleýär" – diýip, Muzeýiň müdiri Ien Bletçford gürrüň berdi.
