Darem uniwersitetiniň we Al-Kadisiýa uniwersitetiniň halkara arheologlar topary Al-Kadisiýa söweşiniň takyk bolan ýeriniň tapylandygyny habar berdi, bu söweş irki yslam taryhynda möhüm ähmiýetli söweş bolupdy. ABŞ-nyň emeli hemralarynyň fotosuratlarynyň 70 ýyldan soň köpçülige ýetirilmegi bu söweşiň bolan ýerini kesgitlemäge kömek etdi.
Biziň eýýamymyzyň 637–638-nji ýyllarynda bolup geçen Al-Kadisiýa söweşi yslamyň Arap ýarym adasynyň çäklerinden daşynda ýaýramagynyň möhüm tapgyry boldy. Arap musulman goşunynyň Sasanylar imperiýasynyň goşunyndan üstün çykmagy häzirki Yragyň we Eýranyň çäginde bu diniň ýaýramagyna ýol açdy.
Şu wagta çenli söweşiň takyk bolan ýeri näbelli bolmagynda galýardy. Barlag toparynyň ýobaşçysy doktor Uilýam Dedmen toparyň turuwbaşdan Darb Zubaýdanyň zyýaratçylyk ugruny öwrenendigini aýtdy.
"1970-nji ýyllaryň hemra suratlaryny häzirki zaman şekilleri bilen deňeşdirip, zyýaratçylaryň esasy duralgalarynyň birnäçesini kesgitläp bildik" – diýip, Dedmen belledi. Seljerme wagtynda garaşylmadyk ýagdaýda alymlar meşhur söweşiň bolan ýerini anyklamaga mümkinçilik berýän alamatlaryň üstünden bardylar.
Sebitiň seljermesi söweşiň Kufa şäheriniň 30 km günortasynda, häzirki Najaf welaýatynda bolandygyny görkezýär.
Dedmeniň sözlerine görä, bu açyş diňe bir geografiki ýerleşişini däl, eýsem, söweşiň bolan landşaftynyň aýratynlyklaryny hem anyklamaga mümkinçilik berdi.
"Bu açyş yslamyň ýaýramagynyň esasy pursatlaryna gaýdyp getirýär we taryhyň ugruny üýtgeden bu ýerde wakalaryň nähili ýaýbaňlanandygyny göz öňüne getirmäge kömek edýär" – diýip nygtady.
