Sekiz agram derejesinde boks boýunça öňki dünýä çempiony 45 ýaşly Menni Pakýao Rizin guramasynyň çempiony Tihiro Sudzukä garşy görkezme tutluşygyny geçirer, şondan soň WBC guşagy üçin titul söweşini geçirmegi göz öňünde tutýar. Bu barada ESPN habar berýär.
Sudzuki bilen söweş 28-nji iýulda Saýtamada bolar, garşydaşlar 68 kg çenli agram derejesinde her biri üç minut dowam edýän üç raund söweşerler.
Pakýaonyň MP Promotions kompaniýasynyň ýolbaşçysy Şon Gibbons güýzde filippinli boksçynyň Las-Wegasda ýarym orta agramda (66,7 kg çenli) WBC tituly üçin Mario Barrios bilen söweşmek isleýändigini aýtdy.
“Men taryhy döretmek isleýärin” – diýip, Pakýao belledi.
Pakýao karýerasynda 62 ýeňiş gazanyp, sekiz ýeňlişe sezewar boldy. 2021-nji ýylyň güýzünde boksdan çekilýändigini mälim etdi, ýöne şu ýyl Parižde geçiriljek Olimpiada gatnaşmaga synanyşdy, HOK onuň haýyşyny ret etdi.
Amerikaly Barrios 29 ýaşynda, onuň hasabynda professional ringde 29 ýeňiş we iki ýeňliş bar. Ol maý aýynda WBC-niň wagtlaýyn guşagyny gorady.
