Şu gün, 5-inden 6-syna geçilýän gije Remezan aýynyň, haýyr-sahawatyň mübärek gijesi - Gadyr gijesi gabat gelýär. Ata-babalarymyz Remezan aýyny aýlaryň seresi, Gadyr gijesini gijeleriň serweri hasaplapdyrlar. Mukaddes Oraza aýynyň Gadyr gijesini agzybirlikde, ýagşy niýetler, iň gowy umyt-arzuwlar bilen garşylapdyrlar.
Musulman dünýäsinde bolşy ýaly, türkmen halky hem Remezan aýyna, şol sanda Gadyr gijesine arzuw-umytlaryň hasyl bolýan, rehim-şepagatyň, ynsanperwerligiň dabaralanýan, haýyr-yhsan işleriň rowaçlanýan aýy hökmünde garaýar. Şonuň üçin-de bu aýyň dowamynda asylly işleri, rehim-şepagatlylygy, mukaddes däp-dessurlary has köp berjaý etmäge, süňňümiz we ahlak babatda päklenmäge, ruhy taýdan täzelenmäge aýratyn üns berilýär.
Ýakynda, has takygy, 29-njy martda döwlet Baştutany Serdar Berdimuhamedow sanly ulgam arkaly geçirilen Ministrler Kabinetiniň nobatdaky mejlisinde jenaýat edendikleri üçin iş kesilen 356 adamyň günäsini geçmek hakynda Permana gol çekdi.
Remezan aýynyň dowam edýän günlerinde, 27-nji martda Ak bugdaý etrabynyň çäginde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda täze metjidiň açylmagy-da on iki aýyň soltany bolan Oraza aýyna mynasyp edilen işleriň biri boldy. Şu gün mukaddes Oraza aýynyň Gadyr gijesiniň hormatyna ýurdumyzyň beýleki welaýatlarynda hem şunuň ýaly täze metjitleriň açyljakdygy bolsa aýdylanlary ýene bir ýola tassyklaýar.
Gadyr gijesi gutly-mübärek bolsun! Bu gijede edýän ybadatlaryňyz, ýagşy dileg-dogalaryňyz Biribaryň dergahynda kabul bolsun!
