Türkmenistanyň Daşky gurşawy goramak ministri Aw baýlyklarynyň döwlet kadastryny ýöretmegiň tertibini tassyklady. Degişli hukuk resminamasy 2024-nji ýylyň 4-nji ýanwarynda Türkmenistanyň Adalat ministrligi tarapyndan döwlet belligine alyndy.
Bu Tertip Türkmenistanyň çägindäki aw baýlyklary baradaky maglumatlary bir umumy resminama toplamagyň, jemlemegiň, peýdalanmagyň we ulgamlaşdyrmagyň tertibini kesgitleýär.
Aw baýlyklarynyň döwlet kadastry - aw baýlyklary baradaky maglumatlary ulgamlaşdyryp özünde jemleýän (kitap we elektron görnüşinde) resminamadyr.
Aw baýlyklarynyň döwlet kadastry Ygtyýarlandyrylan edara tarapyndan aw baýlyklaryna gözegçilik edýän Ygtyýarlandyrylan edaranyň garamagyndaky goraghanalaryň, aw meýdanlaryndan peýdalanyjylaryň, aw hojalygyny ýöredijileriň, Türkmenistanyň Awçylarynyň we balykçylarynyň birleşen jemgyýetiniň her aýda aw baýlyklarynyň görnüşleriniň geografik ýaýraýşy, aw baýlyklarynyň görnüşleriniň mukdary, aw baýlyklarynyň hil häsiýetnamalary, aw baýlyklaryny durnukly peýdalanmak we aw baýlyklarynyň goragy bilen baglanyşykly ýerine ýetirýän işleri barada berýän maglumatlarynyň esasynda ulgam boýunça ýeke-täk görnüşde alnyp barylýar.
Döwlet kadastryna girizilýän maglumatlar gyzyklanýan şahslar üçin elýeter bolmalydyr. Gyzyklanýan şahslaryň resmi ýüz tutmalary esasynda Ygtyýarlandyrylan edara Döwlet kadastryndan soralýan maglumatlary bir aýyň dowamynda berýär.
Resminamanyň doly teksti bilen şu salgydan tanşyp bilersiňiz.
