2022-nji ýylyň oktýabr aýynda geçirilmegi meýilleşdirilýän çäreleriň hem-de medeni-durmuş maksatly desgalaryň açylyş dabaralarynyň maksatnamasy barada wise-premýer M.Mämmedowa 23-nji sentýabrda Hökümet mejlisiniň barşynda hasabat berdi.
Däp boýunça 6-njy oktýabrda «Halk hakydasy» ýadygärlikler toplumynda Hatyra güni mynasybetli gül goýmak çäresi bolar.
Halkara derejesinde geçiriljek çäreleriň hatarynda
- Saglygy goraýyş we derman senagaty işgärleriniň gününe gabatlanyp, halkara sergisini we ylmy maslahatyny;
- «Dizaýn–2022» Aşgabat forumyny we «Araçäksiz dizaýn» atly halkara sergisini;
- «Senetçilik we amaly-haşam sungaty dünýä halklarynyň mirasynda» atly halkara festiwalyny;
- «Türkmen keşdeçilik sungaty – umumyadamzat mirasy» atly halkara maslahatyny geçirmek göz öňünde tutulýar.
