Gyrgyzystanyň Prezidenti Sadyr Japarow Türkmenistanyň Hökümeti bilen Bişkek ýylylyk elektrik bekedine gaz ibermek meselelerini maslahatlaşar. Bu barada 17-nji iýunda Respublikanyň parlamentinde premýer-ministr Ulukbek Maripow belledi diýip, Kaktus.media habar berýär.
Onuň aýtmagyna görä, bu mesele Japarowyň Türkmenistana saparynyň barşynda maslahatlaşylar. Premýer-ministr saparyň wagty barada aýtmady.
«Prezident bu ýurda iş saparyny amala aşyrar. Saparyň barşynda energetiki meselelere garalar: elektroenergiýa, gaz... Häzirlikçe Bişkek ýylylyk elektrik bekediniň gaz üpjünçilik meselesi açyk» — diýip Maripow belledi.
AKIpress agentliginiň bellemegine görä, gepleşikleriň barşynda Merkezi Aziýa — Hytaý gaz geçirijisiniň dördünji şahasy maslahatlaşylar.
«Bu gaz geçiriji gurulmaly, bu halk üçin zerur. Ol bähbitli bolar» - neşir Sadyr Japarowyň geçen ýylyň 12-nji noýabrynda metbugat maslahatynda eden çykyşyndan sözlerini getirýär.
Ýanwar aýynda gyrgyz häkimiýetiniň tabşyrygy boýunça Bişkek ÝEB-ni kömürden gaza geçirmek meselesi işlenip başlandy. Premýer-ministriň wezipesini ýerine ýetiriji Artýom Nowikowyň bellemegine görä, eger-de, Hökümet «Gazprom» kompaniýasy bilen ylalaşsa, onda ÝYB gaz bilen işlemäge geçiriler.
