Amerikanyň “Blue Origin” kompaniýasy syýahatçylar üçin kosmosa bilet satyp başlady. Ony auksion arkaly satyn alyp bolýar diýip, 3dnews.ru habar berýär.
Aýdylmagyna görä, biledi satyn alan kosmos syýahatçysy ilkinji uçuşynda şu ýylyň 20-nji iýulyna meýilleşdirilýän “New Shepard” suborbital kosmiki gämisiniň ekipažyna goşulyp biler.
“20-nji iýulda kosmonawtlar topary “New Shepard”-da ilkinji gezek kosmosa çykar. Biz “Blue Origin” onlaýn auksionynyň ýeňijisine bir mugt orun hödürleýäris"-diýlip, kompaniýanyň metbugat beýanatynda aýdylýar.
Raketanyň uçuryljak senesi auksionyň düzgünlerinde görkezilmedi. Oňa derek kompaniýanyň kosmos uçuryşyny auksion gutarandan soň 6 aýyň içinde amala aşyrjakdygy aýdylýar we açylyş senesi haýsydyr bir sebäbe görä üýtgedilse, “Blue Origin” ýeňijä habar berer.
"Kosmos syýahatçylygyna" dalaşgär bolmak üçin talaplar hem düzgünlerde görkezilýär. Munuň üçin bedeniniň agramy 45 kilogramdan 101 kilograma çenli bolan, boýy bolsa 1,5 metrden 1,95 metre çenli bolan adam dalaş edip biler. Dalaşgär raketanyň bat alýan mahalyndaky ilkinji minutlarda 3G (öz agramyndan üç esse agyr) ýüke, şeýle hem kosmos gämisi gonýan wagty atmosferanyň dykyz gatlaklaryna çenli aşaklanda birnäçe sekundyň dowamynda 5,5G ýüke garşy durmaga taýyn bolmaly.
“New Shepard” raketasyna ilkinji amerikan kosmonawty Alan Şepardyň ady dakyldy. Hünärmenleriň pikiriçe, kosmos syýahaty üçin biletiň bahasy 200 müňden 250 müň dollar aralygynda bolar.