Marvel kinoäleminiň floridaly muşdagy şol bir filme tomaşa etmegiň sany boýunça täze dünýä rekordyny goýdy diýip, kinonews.ru habar berýär. Ginnesiň rekordlar kitabyndaky ýazgynyň delillendirmegine görä, Ramiro Alanis «Ar alyjylar 4: Final» filmine 191 gezek tomaşa edipdir.
Rekordyň eýesiniň aýtmagyna görä, onuň üçin Kapitan Amerikanyň keşbi has ýakyn. «Bu gahryman meniň üçin köp gymmatlyklary özünde jemleýär: dogruçyllyk, hoşniýetlilik, özgeler barada alada etmek» – diýip, ol belledi.
Şeýle netijäni gazanmak pikiri Ramiro ýutubçy NemRapsyň başga bir Marvel filmini – «Ar alyjylar 3: Soňsuzlyk urşy» görmekde rekord goýandygyny görende geldi.
Ýatlap geçsek, «Ar alyjylar 4» filmi 2019-njy ýylda prokata çykdy we birnäçe absolýut rekordlaryny goýdy. Bir dynç gününiň dowamynda kartina 1,2 milliard dollardan gowrak gazanmagy başardy. Şeýle-de, bu öý prokatynda birinji dynç günleri 300 million dollar ýygnan ilkinji film boldy. Mundan başga-da, «Ar alyjylar 4» IMAX torunda hem gowy başlangyjy – 91 million dollar we prokata çykmazyndan öňki gün gowy girdeji ýygymyny – 60 million dollar – görkezdi. Film birnäçe abraýly baýraklara eýe bolup, soňky iki ýylda taryhda iň girdejili film boldy.
