Italiýanyň “Ýuwentus” futbol kluby Çempionlar ligasynyň toparçalaýyn tapgyrynyň altynjy aýlawyndaky oýnunda Ispaniýanyň "Barselonasyndan" myhmançylykda 3:0 hasabynda üstün çykdy.
Kriştianu Ronaldu oýunda 11 metrlik jerime urgusyndan iki pökgi geçirip, dubl etdi (13, 52-nji minut). 3-nji pökgini Weston MakKenni öz adyna ýazdyrdy (20).
Duşuşykda Ronaldu bilen "Barselonanyň" hüjümçisi Lionel Messi 2018-nji ýylyň 6-njy maýyndan bäri ilkinji gezek ýüzbe-ýüz oýnadylar, şonda "Barselona" şol wagt Ronaldunyň çykyş edýän "Realy" bilen 2:2 hasabynda deňme-deň oýnapdy. Şol ýylyň tomsunda portugaliýaly hüjümçi "Ýuwentusa" geçdi. Umuman alanyňda, oýunçylar biri-birine garşy jemi 36 oýun oýnadylar, olardan 16-synda Messiniň, 11-sinde - Ronaldunyň topary üstün geldi, ýene dokuz duşuşyk deňme-deň tamamlandy. Bu oýunlarda Messi - 22, Ronaldu - 21 pökgi geçirdi.
Iki topar hem möhletinden öň Çempionlar ligasynyň 1/8 finalyna çykmagy başardylar. Oýundan soň "G" toparçada "Ýuwentus" birinji, "Barselona" ikinji orunda ýerleşdi. Toparlaryň hersinde 15 utuk bar, ýöne "Ýuwentus" özara duşuşyklaryň netijeleriniň esasynda öňe saýlandy. Üçünji ýeri soňky tapgyrda Wengriýanyň "Ferenswaroşyny" (1:0) ýeňen we 4 utuk gazanan Kiýewiň "Dinamosy" eýeledi, ukrain kluby indi Ýewropa ligasynyň 1/16 finalynda oýnar. 1 utukly Ferenswaroş toparçada iň soňky orny eýeledi.
Çempionlar ligasynyň 1/8 finaly we Ýewropa ligasynyň 1/16 finaly üçin bijeler 14-nji dekabrda Şweýsariýanyň Nýon şäherinde çekiler.