Režissýor Ridli Skott “Gladiator 2” filmini surata düşürmegi resmi taýdan tamamlady. Sikwelde baş keşbi ýerine ýetiriji Pol Meskal Instagram-da režissýor bilen düşen suratyny ýerleşdirip, “Soňy” ýazgysy bilen onuň üstüni ýetirdi. Bu barada RBK habar berýär.
Ridli Skott taryhy dramanyň dowamyny döretmek meýilnamalary barada heniz 2000-nji ýyllaryň başynda aýdypdy. Surata düşüriş işleri diňe 20 ýyldan gowrak wagt soň, 2023-nji ýylyň iýun aýynda başlady. Ýöne önümçiligi Golliwudda aktýorlaryň iş taşlaýyşlary sebäpli togtatmaly boldy. Iş dekabr aýynyň başynda gaýtadan dowam etdirildi. Lentanyň prokata çykjak senesi 2024-nji ýylyň 22-nji noýabryna meýilleşdirilýär.
Ikinji bölümiň wakalary asyl filmiň sýužetinden 25 ýyl soň, birinji bölümde Rassel Krouwyň ýerine ýetirmegindäki Maksimusyň ölüminden köp ýyl geçensoň bolup geçýär. Meskal filmde Lusillanyň (Konni Nilsen) ogly we Kommod imperatorynyň (Hoakin Feniks) ýegeni Lusiýiň keşbini ýerine ýetirýär. Şeýle-de, filmde Barri Keogan, Denzel Waşington we Jozef Kuinn surata düşdi.
Surata düşürme işleri Maltada we Marokkoda geçirildi. Bu film eýýäm ýylyň iň köp garaşylýan taslamalarynyň biri diýlip atlandyryldy.
Asyl film ekrana 2000-nji ýylda çykdy we prokatda 460,5 mln dollar ýygnady. “Oskaryň” eýesi Rassel Krou “Gladiatorda” iň gowy erkek keşbi üçin baýraga mynasyp boldy.
Sikwelde baş keşbi alan 27 ýaşly aktýor Pol Meskal “Adaty adamlar” mini-serialynda Konnel Uoldronyň keşbi bilen meşhur boldy. 2023-nji ýylda “Güneşim” dramasyndaky baş keşbi üçin ilkinji gezek “Oskar” we BAFTA baýraklaryna dalaşgär görkezildi.
