ITALIÝA — «Ýewrowideniýe-2021-iň» ýeňijisi

ITALIÝA — «Ýewrowideniýe-2021-iň» ýeňijisi

22-nji maýda Niderlandlaryň Rotterdam şäherinde geçirilen aýdym-saz bäsleşiginiň jemleýji tapgyrynda Italiýa wekilçilik eden Maneskin rok gruppasy «Zitti e buoni» (Ýuwaşlar we ümsümler) aýdymy bilen ýeňiji bolmagy başardy. 

Bäsleşikde fransiýaly aýdymçy Barbara Prawi «Voilà» (Ine, şeýle) atly aýdymy bilen ikinji orny eýeledi. Baýrakly üçünji orna bolsa «Tout l’Univers» (Bütin dünýä) atly aýdymy bilen şweýsariýaly aýdymçy Gjons Tears mynasyp boldy. 

Russiýanyň adyndan wekilçilik eden, milleti boýunça täjik Maniža «Russian Woman» (Rus zenany) atly aýdymy bilen sanawda 9-njy orny eýeledi. 

Aýdym-saz muşdaklarynyň iň söýgüli bäsleşikleriniň biri bolan «Ýewrowideniýäniň» 2021-nji ýylda 65-nji gezek geçirilen nobatdaky bäsleşiginiň jemleýji tapgyrynda Kipr, Albaniýa, Ysraýyl, Belgiýa, Russiýa, Malta, Portugaliýa, Serbiýa, Beýik Britaniýa, Gresiýa, Şweýsariýa, Islandiýa, Ispaniýa, Moldowa, Germaniýa, Finlýandiýa, Bolgariýa, Litwa, Ukraina, Fransiýa, Azerbaýjan, Norwegiýa, Niderlandlar, Italiýa, Şwesiýa, San-Marino ýaly jemi 26 döwletiň aýdymçysy wekilçilik etdi.