Amerikanyň transmilli korporasiýasy bolan Microsoft ofise gaýdyp gelmek ýa-da uzak aralykdan işlemegi dowam etmek baradaky karary işgärleriniň özlerine goýdy. Bu barada Sputnik gullugy habar berdi.
Microsoft häzirki şertlerde işgärleri üçin çeýe iş şertlerini üpjün etmegiň möhümdigini aýtdy.
"Işgärler şularyň birini saýlamaly: ýaha ofise gaýdyp gelmeli, ýa-da uzakdan işlemegi dowam etdirmeli. Gerek bolsa, formatlaryň ikisini hem birleşdirip bilerler"-diýlip, kompaniýanyň habarynda aýdylýar.
Şol bir wagtyň özünde, Microsoft işgärleriň ofis işine gaýdyp gelmek strategiýasynyň işlenip düzüljekdigini, onda yzygiderli üýtgeýän epidemiologik şertleriň göz öňünde tutuljakdygyny aýtdy. Bu strategiýada Microsoft işgärleriň işine 6 ballyk şkala boýunça baha berer.
Köpmilletli Microsoft kompaniýasy 1975-nji ýylda Pol Allen we Bill Geýts tarapyndan esaslandyryldy we onuň merkezi edarasy Waşingtonyň Redmond şäherinde ýerleşýär. Kompaniýa programma üpjünçiligi boýunça, hususan-da, dünýäniň iň meşhur operasiýa ulgamy bolan Windows-y çykarmakda ýöriteleşendir.
