ABŞ-nyň häzirki Prezidenti Donald Tramp ABŞ-nyň prezident saýlawlarynda ýeňşini bellemäge taýýarlanýandygyny aýtdy.
Trampyň pikiriçe, ol Ogaýo, Tehas, Florida, Jorjiýa, Demirgazyk Karolina, Pensilwaniýa, Miçigan, Wiskonsin ýaly ştatlarda Demokratik partiýadan dalaşgär Jo Baýdenden öňe geçýär. Bu barada Gazeta.Ru habar berýär.
Tramp çykyşynyň başynda deslapky saýlaw netijeleriniň fenomenaldygyny aýtdy.
“Biz ýeňiş gazanmaga taýýar. Hemmämiz ýeňeris... Biz garaşmaýan ştatlarymyzda ýeňiş gazandyk"-diýip, Prezident aýdýar.
3-nji noýabrda ABŞ-da döwlet baştutanynyň we wise-prezidentiň, Wekiller palatasynyň 435 agzasynyň hemmesiniň, Senatyň üçden bir böleginiň (35 senator), 11 ştatyň we iki sebitiň häkimleriniň, şeýle hem käbir ştatlaryň kanun çykaryjy mejlisleriniň saýlawlary geçirildi.
“Fox News” teleýaýlymynyň habaryna görä, Demokratik partiýadan dalaşgär Jo Baýden saýlawçylaryň 238 sesini, Tramp bolsa 213 sesini aldy. Käbir ştatlarda netijeler entek sanalmady.
Amerikanyň Birleşen Ştatlarynda saýlawlar iki basgançakly meýilnama boýunça geçirilýär: birinji etapda her ştatyň saýlawçylary prezidentlige dalaşgärlere ses berýärler. Ýeňiji şol ştatdan ähli saýlawçylary alýar. Saýlawçylar jemi 538 sany (Kongresiň agzalarynyň sanyna görä). Hut şolar soňra döwlet baştutanyny saýlaýarlar (şu ýyl ses berişlik 14-nji dekabrda meýilleşdirilýär). Ýeňmek üçin hökmany suratda 270 ses almaly.
Saýlawyň netijeleri, esasan, garşydaşlaryň reýtinginde tapawut az bolan "iki göwünli" ştatlaryň netijelerine baglydyr.