Çagalar üçin niýetlenen “Ýeralaş” gülküli kinožurnalynyň çeper ýolbaşçysy Boris Graçewskiý 72 ýaşynda aradan çykdy. Bu barada TASS habar berdi.
28-nji dekabrda režissýor agentlige hassahana ýerleşdirilendigini habar berdi, şondan öň ol koronawirus ýokuşmagy sebäpli öýünde bejergi alýan eken. 10-njy ýanwarda onuň aýaly Ýekaterina Belotserkowskaýa lukmanlaryň ozal reanimasiýa geçirilen Graçewskiniň ýagdaýyny durnuklaşdyryp bilendiklerini aýtdy.
Graçewskiý 1949-njy ýylyň 18-nji martynda Moskwada dünýä indi. 1968-nji ýylda ol Kaliningrad mehaniki kollejini tamamlady. Soňra Gorkiý adyndaky Çagalar we ýaşlar filmleriniň merkezi kinostudiýasynda uly administrator wezipesinde işledi. 1974-nji ýylda dramaturg Aleksandr Hmelik bilen bilelikde ol çagalar üçin niýetlenen "Ýeralaş" gülküli kinožurnalyny döretdi. 1974-1984-nji ýyllarda Graçewskiý "Ýeralaş"-yň režissýory, 1984-nji ýyldan bäri bolsa çeper ýolbaşçysy bolup işledi. Şeýle hem ol "Üçek" we "Notalaryň arasynda ýa-da Tantrik simfoniýasy" filmleriniň režissýory hökmünde tanalýar. Onuň alan baýraklarynyň arasynda Hormat we Dostluk ordenleri bar.
