Alymlar çili burçunyň yzygiderli iýilmeginiň saglyk üçin peýdalydygyny we hatda ömri uzaldyp biljekdigini anykladylar. Barlag işleriniň maglumatlaryna görä, bu önümi söýüjilerde rak we ýürek-damar kesellerinden ýogalmak ähtimallygy az diýip, medikforum.ru belläp geçýär.
Mundan ozalky barlaglar çili burçunyň iýilmeginiň sowuklama garşy, antioksidant we çişe garşy täsiri ýüze çykarýandygyny, şeýle hem ganyň düzüminde glýukozanyň derejesini kadalaşdyrýandygyny görkezdi. Awtorlar dünýäniň öňdebaryjy saglygy goraýşyň maglumatlar bazasynyň bäşisinden (Ovid, Cochrane, Medline, Embase we Scopus) 4729 işi seljerdiler. Dört sany esasy iş aýratyn çili burçunyň täsirine bagyşlanýar.
ABŞ-da, Italiýada, Hytaýda we Eýranda 570 000-den gowrak adamyň saglygy we iýmitlenişi baradaky ýazgylar çili burçuny iýýänleriň netijelerini burçy seýrek ýa-da hiç haçan iýmedik adamlar bilen deňeşdirmek üçin ulanyldy. Netijede, burçy seýrek ýa-da asla iýmeýänler bilen deňeşdirilende, çili burçuny söýüjiler üçin ýürek-damar kesellerinden ýogalmak howpunyň 26%, rak keselinden – 23% we islendik sebäpden ölüm howpunyň 25% azalýandygy ýüze çykaryldy.
Ýöne çili burçunyň saglyga peýdasynyň takyk sebäpleri heniz belli däl. Alymlar bu önümiň düzümi we organizme täsiri barada has giňişleýin bilmek üçin ony öwrenmegi dowam etdirerler.
