Düýn COVID-19 pandemiýasy sebäpli uzak arakesmeden soň UEFA Çempionlar ligasynyň oýunlary täzeden badalga aldy. Ýewropa futbolynyň ägirtleri "Real Madrid" we "Ýuwentus" ýaryşdan çykdy.
“Mançester Siti” 1/8 finalynyň jogap oýnunda "Real Madridi" öz öýünde 2-1 hasabynda ýeňdi. Korollyk klubuň derwezesine geçirilen toplarda "Real Madridiň" goragçysy Rafael Waranyň ýalňyşlyklary uly rol oýnady. Toplary Rahim Sterling (9-njy minut) bilen Gabriel Jesus (68) öz atlaryna ýazdyrdylar. “Realdan" bolsa Karim Benzema tapawutlandy (28).
Toparlaryň arasyndaky ilkinji gapma-garşylyk hem şeýle hasap bilen tamamlanypdy. Netijede, Pep Guardiolanyň topary jemi 4:2 hasabyndaky ýeňşi bilen ýaryşyň indiki tapgyryna ýollanma aldy.
Şonuň bilen bir wagtda, Fransiýanyň “Lion” kluby Italiýanyň “Ýuwentusyndan” 1:2 hasabynda asgyn geldi. Ýöne şunuň özi hem Kriştianu Ronaldony we onuň ýoldaşlaryny ýaryşdan çykarmak üçin ýeterlik boldy. “Lion” ilkinji duşuşykda “Ýuwe”-ni 1-0 hasabynda ýeňlişe sezewar edendigi, ýagny myhmançylykda geçirilen gol düzgüni sebäpli indiki tapgyra çykmagy başardy.
“Liondan” 12-nji minutda Memfis Depaý penaltiden tapawutlandy. “Ýuwentusdan” bolsa Kriştianu Ronaldo 2 pökgi geçirdi (43 - penalti, 60).
"Lion" çärýek finalda iňlisleriň "Mançester Sitisi" bilen duşuşar.
Jemi 36 pökgi geçiren Ronaldo düýnki duşuşykda möwsümdäki netijelilik boýunça klub rekordyny täzeledi. Ondan öň bu rekord 1925/26 möwsüminde 35 pökgi geçiren wengriýaly hüjümçi Ferens Hirzere degişlidi. Portugaliýaly hüjümçi 130 pökgi bilen Çempionlar ligasynda hem rekord eýesidir. Bu görkeziji boýunça Lionel Messi (114) ikinji ýerde durýar.
Portugaliýaly futbolçy 2009/10 möwsüminden bäri ilkinji gezek Çempionlar ligasynyň çärýek finalynda oýnamaz. Gyzykly ýeri, ol Ispaniýanyň “Real Madrid” topary bilen 2009/10 möwsüminde hem “Liondan” ýeňlipdi.