Serdar Berdimuhamedow Hindistanyň Prezidentini Respublika güni bilen gutlady

Prezident Serdar Berdimuhamedow Hindistan Respublikasynyň Prezidenti hanym Draupadi Murmuwa ýurduň milli baýramy — Respublika güni mynasybetli tüýs ýürekden gutlaglaryny we iň gowy arzuwlaryny iberdi. Bu barada TDH döwlet habarlar agentligi habar berýär.
«Biz Türkmenistan bilen Hindistan Respublikasynyň arasyndaky dostlukly gatnaşyklara ýokary baha berýäris. Bu gatnaşyklaryň geljekde hem iki ýurduň halklarynyň bähbitlerine mundan beýläk-de pugtalandyryljakdygyna uly ynam bildirýäris» diýip, döwlet Baştutany belledi.
Türkmenistanyň Prezidenti ýakymly mümkinçilikden peýdalanyp, Draupadi Murmuwa tüýs ýürekden berk jan saglyk, bagtyýarlyk, Hindistanyň halkyna bolsa parahatçylyk, abadançylyk hem-de rowaçlyk arzuw etdi.
Hindistanyň Respublika güni 1950-nji ýylyň 26-njy ýanwarynda ýurduň Konstitusiýasynyň kabul edilmegini hem-de ýurduň britan dominiony derejesinden respublikan dolandyryş ulgamyna geçmegini alamatlandyrýan milli baýramçylykdyr.