Hytaýly alymlar rak keseliniň gaýtalanmagynyň öňüni alyp biljek synag nanowkasinasyny hödürlediler. Dermanyň netijeliligi haýwanlarda geçirilen laboratoriýa synaglarynda tassyklandy diýip, Phys.org ýazýar.
Hytaýyň Ylymlar akademiýasynyň Nano ylymlar we tehnologiýa milli merkeziniň hünärmenleri barlagyň netijelerini Cell Reports Medicine ylmy žurnalynda paýlaşdylar.
Sanjym hassanyň çiş öýjükleriniň membranalaryndan bölünen antigenlere esaslanýar. Derman immun ulgamyna rak öýjüklerini tanamaga we ýok etmäge itergi berýär, olaryň täzeden döremegine we metastazlaryň ösmegine päsgel berýär.
Usulyň aýratynlygy çiş membranalarynyň operasiýadan owal nanoformulirlenen liposomal doksorubisin (NP-Dox) bilen öňünden bejerilmegidir. Syçanlarda geçirilen synaglaryň görkezişi ýaly, öýjükleriň immunogen häsiýetlerini güýçlendirýär: keseliň gaýtalanmasy ep-esli azaldy.
Alymlar bu usuly kliniki tejribä girizmek üçin goşmaça barlaglary geçirmegi meýilleşdirýärler.
Şonuň bilen birlikde, beýleki ýurtlar hem rak keseline garşy sanjymlary barlaýarlar. Mysal üçin, Angliýada Milli Saglyk Gullugy hassalaryň gatnaşmagynda kliniki synaglara başlady. Awgust aýynda öýkeniň rak keseli bolan 67 ýaşly iňlis adamy Londonda ilkinji sanjymy aldy. Hünärmenleriň sözlerine görä, bu derman galyndy çiş öýjüklerini ýok edip, keseliň gaýtalanmagynyň öňüni alýar. The Guardian gazetiniň habar bermegine görä, adamda sanjymyň birinji fazasynyň kliniki synaglary ýedi ýurtda – Beýik Britaniýa, ABŞ, Germaniýa, Wengriýa, Polşa, Ispaniýa we Türkiýe ýaly ýurtlaryň 34 barlag meýdançasynda geçirilýär.
