Smartfonlary bilen giňden tanalýan Xiaomi kompaniýasy, elektromobil bazaryna girenine entek bir ýyl hem bolmanka, eýýäm 200 müň ulag satmagy başardy.
«CnEVPost» neşiriniň habaryna görä, SU7 sedanynyň özboluşly gyzyl-gülgüne reňkli ýubileý nusgasy sişenbe güni müşderilere gowşuryldy. Bu ulagy hytaýly ýaş jübüt satyn aldy.
Ilkinji 100 müň ulag müşderilere 229 günüň dowamynda gowşuryldy, ikinji ýüzlük bolsa bary-ýogy 119 günde eltildi. Hytaýdaky zawodda işiň iki çalşykda (smenada) alnyp barylýandygy we SU7 üçin sargytlaryň 7 aý öňünden kabul edilendigi sebäpli, şeýle netijeleri gazanmak başartdy.
200 müňünji gyzyl-gülgüne SU7 – şol reňkde öndürilen ilkinji nusgadyr, ol Xiaomi kompaniýasynyň 15 ýyllygy mynasybetli, 2024-nji ýylyň 31-nji dekabrynda öndürildi. Xiaomi SU7-niň resmi tanyşdyrylyşy bolsa, 2023-nji ýylyň 28-nji martynda bolupdy.
Şu ýylyň jemleri boýunça, Xiaomi öň meýilleşdirilen 300 müň elektromobiliň ýerine 350 müň awtoulag öndürmegi maksat edinýär. SU7 sedanynyň üç «raýat» görnüşi bilen bilelikde, bu sana 1500 at güýjüni öndürýän SU7 Ultra sportkary hem-de öňümizdäki tomusda satuwa çykaryljak YU7 krossoweri hem degişli bolar.
