Brýusseliň azatlyk uniwersitetiniň (VUB) alymlary Yragyň Günbatar çölünde 1,5 million ýyllyk daş gurallary tapdylar diýip, Phys.org ýazýar.
VUB-yň arheologiki ekspedisiýasy Yragyň Günbatar çölündäki Aş-Şabaka sebitinde gözleg işlerini tamamlady. Şol ýerden irki we orta paleolit döwrüne degişli ýedi ýadygärlik hem-de 850-den gowrak gadymy tapyndy ýüze çykaryldy.
«Bu tapyndylar bize gadymy adamlaryň tebigaty nädip ulanandyklaryna we howa şertlerine nähili uýgunlaşandyklaryna düşünmäge ýardam berer» diýip, ekspedisiýanyň baştutany Ella Egberts düşündirdi.
Tapyndylaryň arasynda 1,5 million ýyllyk daş el paltalary, şeýle-de 300 müň-40 müň ýyl ozal peýda bolan lewaluaz usulynda ýasalan daş bölekleri hem bar. Bu daş bölekleri inçejik plitalar görnüşinde bolup, takyk işleri ýerine ýetirmek üçin ulanylypdyr.
Gözleg işleri pleýstosen döwründe uly kölüň bolan ýerinde geçirildi. Emma häzirki wagtda ol köl guran. Alymlaryň pikirine görä, gadymy adamlar bu sebiti suw we gural ýasamak üçin çig mal çeşmesi hökmünde ulanypdyrlar.
