ABŞ-nyň Azyk we derman serişdelerine sanitar gözegçilik müdirligi (FDA) Dostarlimab derman serişdesine (brend dermanynyň ady - Jemperli) ýogyn içegäniň rak keselini bejermek üçin “öňdebaryjy terapewtiki serişde” statusyny berdi diýip, New Atlas habar berýär.
Düzgünleşdirijiniň karary Sloun-Ketteringiň Memorial onkologiýa merkezinde (MSK) geçirilen kliniki synaglaryň maglumatlaryna esaslanýar: derman ähli gatnaşyjylarda çişleri ýok etdi.
Netijeler ilkibaşda 24 hassany öz içine aldy, ýöne maglumatlar soňra 42 adama çenli giňeldildi. Gatnaşanlaryň hemmesi keseliň alamatlary ýok diýen doly kliniki jogaby görkezdiler. Ýaramaz täsirleri az boldy we hassalaryň köpüsi dört ýyldan gowrak wagt bäri sagdyn bolmagynda galýarlar.
“Bu täze bejeriş serişdesi täsiriniň örän ýokary derejede dowamlydygyny görkezýär. Barlaga gatnaşyjylaryň köpüsinde azyndan bir ýyla çenli gaýtalama ýüze çykmady we ilkinji gatnaşyjylar eýýäm dört ýyldan bäri sagdyn bolmagynda galýarlar we gutulanlaryň sany köpelýär. Üstünligiň derejesi 100% "- diýip, MSK-nyň onkolog-gastroenterology Andrea Serçek gürrüň berýär.
Işläp taýýarlaýjy GlaxoSmithKline (GSK) kompaniýanyň wekili Heşam Abdullanyň sözlerine görä, täze status derman serişdesiniň bazara çykarylmagyny tizleşdirer, bu bolsa onuň halk köpçüligine elýeterli boljak wagtyny üç ýyl töweregi gysgaldar.
Amerikanyň Birleşen Ştatlarynda her ýyl 46 müň adama ýogyn içegäniň rak keseli kesel kesgidi goýulýar.
