Eýranyň Milli gaz kompaniýasynyň baş müdiri Majid Çegani günde 10 million kub metr türkmen gazynyň synag hökmünde iberilýändigini aýtdy.
Orient agentliginiň Mehr agentligine salgylanyp habar bermegine görä, bu barada ol metbugat ýygnagynda habar beriş serişdelerine aýtdy. Çegani: “Türkmenistana bergimizi üç tapgyra bölüp töledik we indi bu ýurtdan gaz çalşygynyň mukdaryny günde 4,5 milliondan 8 million kub metre çenli artdyrdyk. Türkmenler bilen gysga möhletli we uzak möhletli görnüşlerde gaz importy barada ylalaşdyk."
Resmi wekiliň sözlerine görä, Türkmenistandan her günde 10 million kub metr gaz üpjünçiligi boýunça synag üstünlikli geçirildi. Bu meýilnamalar Türkmenistanda gaz ýataklaryny mundan beýläk-de ösdürmegiň geljegine laýyklykda importyň mukdaryny ýokarlandyrmagy öz içine alýar.
2021-nji ýylyň noýabr aýynda Aşgabatda Eýran bilen Azerbaýjanyň arasynda türkmen «mawy ýangyjyny» swoplaýyn ugratmak meselesinde möhletsiz üçtaraplaýyn şertnama gol çekildi.
2022-nji ýylda Türkmenistan şertnamanyň çäklerinde her günde Eýrana 4-4,5 million gaz ugratdy.
Şunlukda, Tähran bilen Baku agzalan çalşyk shemasy esasynda türkmen tebigy gazynyň importyny iki esse artdyrmaga taýýardyklaryny mälim etdiler.
