В Туркменистане организована всесторонняя подготовка по предотвращению проникновения COVID-19

Adamyň saglygyna uly howp salýan we şoňa görä-de, bütin dünýä jemgyýetçiliginde biynjalyklanma döredýän täze koronawirus ýokanjynyň Türkmenistana getirilmeginiň we onuň ýaýramagynyň öňüni almak boýunça tabşyryklaryndan ugur alnyp, bu meseleler yzygiderli gözegçilikde saklanylýar, ýokary derejede hemmetaraplaýyn taýýarlyk işleri guraldy. Bu barada Saglygy goraýyş we derman senagaty ministri N.Amannepesow Prezident Gurbanguly Berdimuhamedowyň Balkan welaýatynyň Türkmenbaşy şäherinde «Awaza» kongresler merkezinde geçiren Ministrler Kabinetiniň göçme mejlisinde habar berdi.
Mejlisde ýurdumyzyň çäklerine koronawirus ýokanjynyň aralaşmagynyň we ýaýramagynyň öňüni almak üçin görülýän meýilleşdirilen çäreler bilen baglanyşykly meselelere garaldy. Bu meseleler boýunça ýolbaşçylaryň hasabatlary diňlenildi, bu ugurda öňde durýan wezipeler kesgitlenildi.
Bellenilişi ýaly, raýatlarymyzyň saglygy baradaky aladalarynyň netijesinde ýokanç keselleri öňünden duýdurmak, ilatyň bu kesellere garşy göreşmek ukybyny ýokarlandyrmak boýunça giň gerimli ulgamlaýyn işler ýaýbaňlandyryldy.
Türkmenistanda käbir ýokanç keseller, şol sanda drakunkuloz, poliomiýelit, gyzzyrma, gyzamyk we gyzylja ýaly keseller ýok edildi. Gazanylan üstünlikler halkara guramalar tarapyndan ykrar edildi hem-de degişli Güwänamalar bilen tassyklanyldy.
Soňky ýyllarda duzy ýodlaşdyrmak boýunça netijeli işler geçirildi. Bu bolsa ýoduň ýetmezçiligi bilen baglanyşykly ýüze çykýan keselleri netijeli öňünden duýdurmaga mümkinçilik berdi. Ýurdumyzyň ählumumy ýodlaşdyrmagyň gazanylandygy barada halkara Güwänama mynasyp bolmagy bu işleriň netijesi boldy. Türkmenistanyň GDA girýän döwletleriň we Merkezi Aziýa ýurtlaryň arasynda ilkinji, dünýäde bolsa dördünji ýurt bolup, duzy halkara ölçeglerine laýyklykda ýodlaşdyrmagy üpjün edýän ýurt hökmünde ykrar edilendigi bellärliklidir.