Mary welaýatynyň taryhy we ülkäni öwreniş muzeýiniň ylmy işgäri Sülgün Ahmedowa «2023-nji ýylyň iň göreldeli muzeý işgäri» adyna mynasyp boldy.
22-nji dekabrda Arkadag şäheriniň Taryhy we ülkäni öwreniş muzeýinde Türkmenistanyň Medeniýet ministrliginiň we Türkmenistanyň Kärdeşler arkalaşygynyň guramagynda «Täze Galkynyş döwri we milli miras» atly bäsleşigiň jemleýji tapgyry geçirildi. Onuň dowamynda deslapky tapgyrlarda ýeňiji bolan ýurdumyzyň ähli welaýatlaryndan, Aşgabat we Arkadag şäherlerinden jemi 16 muzeý işgäri «2023-nji ýylyň iň göreldeli muzeý işgäri» adyna eýe bolmak ugrunda özara bäsleşdiler.
Bäsleşigiň esasy şertleri oňa gatnaşyjylaryň ýylyň dowamynda ýurdumyzyň ösüşi, ýaşlar syýasaty barada ylmy maglumat ýazmak, muzeý işi, milli mirasymyz barada köpçülikleýin habar beriş serişdelerinde çykyş etmek, ony wagyz etmek, muzeý esbaplaryny toplamak bilen onuň gaznasyny baýlaşdyrmak, taryhy ýadygärliklere ekskursiýalary guramak, usuly gollanma taýýarlamak ýaly ugurlary öz içine alýar. Şeýle-de olar Gurbanguly Berdimuhamedowyň «Türkmeniň döwletlilik ýörelgesi» atly kitabyndan bir parçany çeper ýerine ýetirmek, Türkmenistanyň taryhyna, muzeý işine degişli berlen sowallara jogap bermek boýunça ýaryşdylar.
Bäsleşigiň ýeňijilerine we gatnaşyjylaryna Türkmenistanyň Kärdeşler arkalaşygynyň Milli merkezi we Türkmenistanyň Medeniýet ministrligi tarapyndan gymmatbahaly sowgatlar, höweslendiriji baýraklar we hormat hatlary gowşuryldy.
