«Medeniýet hepdeligi — 2023» iri döredijilik forumynyň ikinji gününiň maksatnamasyna laýyklykda, 23-nji iýunda irden Medeniýet hepdeligine gatnaşyjylar üçin “Nusaý” döwlet taryhy-medeni goraghanasyna gezelenç guraldy.
Döredijilik çäresine gatnaşyjylar Parfiýa şalygynyň ýadygärliklerini öwrenmegiň taryhy, medeni goraghananyň muzeýinde görkezilýän, arheologlar tarapyndan üsti açylan tapyndylar, düýpli gözlegleri talap edýän bu gymmatlyklar barada soňky ýyllarda edilen ylmy açyşlar bilen tanyşdylar.
Soňra Medeniýet hepdeligine gatnaşyjylar Döwlet medeniýet merkeziniň Mukamlar köşgünde Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygy mynasybetli ýurdumyzyň tirmeçi bagşylarynyň arasynda geçirilen «Magtymguly, sözlär tili türkmeniň» atly festiwalda ýerine ýetirilen çykyşlara tomaşa etdiler.
Günüň ikinji ýarymynda Döwlet medeniýet merkeziniň Döwlet muzeýinde ýurdumyzyň taryhy-medeni ýadygärlikleriniň öwrenilmegine hem-de goralyp saklanylmagyna bagyşlanan halkara ylmy duşuşyk geçirildi.
Döredijilik forumynyň çägindäki çäreler Türkmenistanyň Şekillendiriş sungaty muzeýinde guralan ýurdumyzyň belli suratkeşleriniň, heýkeltaraşlarynyň, külalçylarynyň häzirki zaman eserleriniň sergisi bilen dowam etdi.
Medeniýet hepdeliginiň ikinji gününiň çäreleri “Türkmengaz” döwlet konserniniň medeni-işewürlik merkezinde geçirilen konsert bilen tamamlandy. Bu ýerde ýurdumyzyň Balkan we Daşoguz welaýatlarynyň döredijilik toparlarydyr aýdymçylary özleriniň ussatlyklaryny görkezdiler.
