5-nji aprel Prezident Serdar Berdimuhamedow Türkiýe Respublikasynyň Palatalar we biržalar birleşiginiň başlygy Rifat Hisarjyklyogluny kabul etdi.
Doganlyk ýurduň kompaniýalarynyň milli ykdysadyýetimiziň möhüm pudaklarynyň ösüşine we döwrebaplaşdyrylmagyna işjeň gatnaşmagynyň türkmen-türk gatnaşyklarynyň netijeli häsiýete eýedigini görkezýändigini belläp, Prezident Serdar Berdimuhamedow iki ýurduň söwda-ykdysady hyzmatdaşlygynyň möhüm görkezijilerine ünsi çekdi.
Bellenilişi ýaly, geçen ýylyň jemleri boýunça döwletara söwda dolanyşygynyň möçberleri ABŞ-nyň 3 milliard dollaryna golaýlady. Bu bolsa 2021-nji ýyl bilen deňeşdirilende görkezijileriň 6,5 göterim artandygyny görkezýär.
Şeýlelikde, Türkiýe 2022-nji ýylda Türkmenistanyň söwda dolanyşygynda ikinji orna çykdy. Şu ýylyň ýanwar-fewral aýlarynda bu görkeziji ABŞ-nyň 406,8 million dollaryna deň boldy. Munuň özi geçen ýylyň degişli döwründäkiden 9,7 göterim artykdyr.
Bu barada aýtmak bilen, Serdar Berdimuhamedow iki ýurduň arasyndaky söwda dolanyşygynyň möçberlerini ýakyn wagtda ABŞ-nyň 5 milliard dollaryna ýetirmek üçin zerur mümkinçilikleriň dörediljekdigine ynam bildirdi.
Duşuşygyň dowamynda döwlet Baştutanymyz we myhman ägirt uly mümkinçilikleri bolan hyzmatdaşlygyň geljekki ugurlary boýunça pikir alyşdylar. Onuň dowamynda özara haryt dolanyşygyny ösdürmegiň ugurlary ara alnyp maslahatlaşyldy.
Ikitaraplaýyn söwda-ykdysady gatnaşyklary pugtalandyrmak meselelerine yzygiderli üns berýändigi üçin döwlet Baştutanymyza hoşallyk bildirip, Türkiýe Respublikasynyň Palatalar we biržalar birleşiginiň başlygy Rifat Hisarjyklyoglu türkiýeli işewür toparlaryň Türkmenistanda ýaýbaňlandyrylan giň möçberli özgertmeler maksatnamalarynyň we düzümleýin taslamalaryň durmuşa geçirilmegine işjeň gatnaşmaga taýýardyklaryny tassyklady.
