Türkmenistanyň halk artisti, opera aýdymçysy Atageldi Garýagdyýew «Arkalaşygyň Ýyldyzy» baýragyna mynasyp boldy. Bu barada turkmenistan.ru internet-neşiri habar berýär.
«Arkalaşygyň Ýyldyzy» döwletara baýragy gowşurmak boýunça geňeşi 2018-nji ýyl üçin GDA-nyň esasy ynsanperwer baýragynyň eýelerini yglan etdi. Bu baýrak ynsanperwer ulgamdaky dünýä derejesine laýyk gelýän we GDA gatnaşyjy döwletleriň her biriniň ösmegine ýardam edýän iň bir üstünlikli tagallalary üçin her ýylda GDA döwletleriniň wekillerine gowşurylýar. Baýragyň möçberi – 2 million rubl.
Şu ýyl baýragy almak üçin 9 döwletden 14 sany dalaşgär dalaş etdi. Emin agzalarynyň çözgüdi bilen Belarusdan, Azerbaýjandan, Ermenistandan, Gazagystandan, Gyrgyzystandan, Moldowadan, Russiýadan, Türkmenistandan we Täjigistandan jemi 11 adam bu baýraga mynasyp boldy.
«Arkalaşygyň Ýyldyzy» baýragynyň ilkinji gezek Türkmenistandan ýeňijisi Atageldi Garýagdyýew boldy.
Atageldi Garýagdyýew — Türkmen milli konserwatoriýasynyň professory. Köp ýyllaryň dowamynda Magtymguly adyndaky opera we balet teatrynda işledi. Ol «Galkynyş» we «Garaşsyz döwlete bolan söýgüsi üçin» ordenlerine, «Gaýrat», «Türkmenistanyň Garaşsyzlygynyň 20 ýyllygyna», «Magtymguly Pyragy» we «Türkmenistanyň Garaşsyzlygynyň 25 ýyllygyna» medallaryna mynasyp boldy.
Döwletara baýraklar 15-nji maýda Aşgabatda GDA gatnaşyjy agza döwletleriň döredijilik we ylmy intelligensiýasynyň XIV forumynda dabaraly ýagdaýda gowşurylar.
