Halkara sambo federasiýasy (FIAS) Moskwada geçen mejlisinde 2020-nji ýylda sambo boýunça dünýä çempionatyny Türkmenistanyň paýtagty Aşgabatda geçirmek hakynda karar kabul etdi.
Türkmenistanyň Olimpiýa komitetiniň baş sekretary Azat Myradow FIAS-nyň mejlisiniň dowamynda oňa gatnaşyjylary iri halkara ýaryşlaryny geçirmekde ýurdumyzyň baý tejribesiniň bardygyna ynandyrdy.
Ýaryşyň baýrak fondunyň 216 müň amerikan dollaryna barabar bolmagyna garaşylýar – diýip FIAS-nyň prezidenti Wasiliý Şestakow belleýär, diýip sng.today habar berýär.
Şeýle hem, FIAS-nyň Ýerine ýetiriji komitetiniň kararyna laýyklykda, ussatlaryň (weteranlaryň) arasynda sambo boýunça dünýä çempionaty Kiprde 2019-njy ýylyň 18-21-nji oktýabrynda geçiriler.
2020-nji ýylda başlap şeýle hem kenarýaka sambo boýunça dünýä çempionaty we sambo boýunça toparlaýyn Dünýä kubogy geçiriler. Sambo boýunça 2019-njy ýylda dünýä çempionaty Seulda (Koreýa Respublikasy) 7-11-nji noýabr aralygynda geçiriler.
Mundan öň türkmen paýtagtyndaky Olimpiýa şäherçesinde 2017-nji ýylda Ýapyk binalarda we söweş sungaty boýunça V Aziýa oýunlary, 2018-nji ýylda bolsa, «Amul – Hazar 2018» halkara awtorallisi we Agyr atletika boýunça Dünýä çempionaty üstünlikli geçirildi.
