Ingenuity dikuçary Marsyň üstünde şu ýylda ilkinji we häzire çenli 19-njy uçuşyny amala aşyrdy diýip, NASA-nyň Reaktiw hereket barlaghanasy habar berdi.
“Atmosferadaky ýokary tozan düzümi sebäpli birnäçe gijikdirmelerden soň 2022-nji ýylda Mars dikuçarynyň ilkinji uçuşyny bellemegiň wagty geldi” – diýlip, barlaghananyň Twitterdäki habarynda aýdylýar.
NASA-nyň maglumatlaryna görä, Ingenuity howada 100 sekunt bolup, 62 metr aralygy geçdi.
Gyzyl planetada bolan döwrüniň dowamynda dikuçar 19 uçuşy amala aşyrmak bilen, Marsyň üstünde tas 34 minut bolup, jemi 4 km geçdi. Iň uzyn uçuş 9-njy boldy, şonda ol 625 metr geçdi. 2021-nji ýylyň 19-njy aprelinde Marsdaky ilkinji uçuşynda dikuçar üç metr ýokary galyp, Marsyň üstünde 39 sekunt boldy. Ingenuity enjamynyň diametri 1,2 metr we agramy 1,8 kg bolup, iki kamera bilen üpjün edilendir. Ol ýeri surata düşürmek üçin howada 20-30 sekunt saklanyp bilýär.
Ingenuity dikuçary bilen Perseverance marsohody 18-nji fewralda Gyzyl planetanyň üstüne üstünlikli gondy. Amerikan awtomatik planetara stansiýasy geçen ýylyň 30-njy iýulynda Marsa goýberildi.
Perseverance NASA tarapyndan Gyzyl planetany öwrenmek üçin iberilen bäşinji amerikan marsohodydyr.